جدا اوسته باشون قارداش ایدوب دنیانی نورانی

باجون زینب سنه قربان تلاوت ایله قرآنی

ادامه در ادامه ی مطلب

جدا اوسته باشون قارداش ایدوب دنیانی نورانی

باجون زینب سنه قربان تلاوت ایله قرآنی

جمالون نوردور غرق ایلیوب بو کوفه نی نوره

جدانی نور رخسارون حسین تبدیل ایدوب طوره

بو شور عشقدور موسانی گتدی طوریده شوره

سالوبدور حیرته باشون اخا موسی ابن عمرانی

باشون عیسی مثل نوک جداده چکدیلر داره

سنون بو حالتون ایتدی گوزومده گوندوزی قاره

گجه هاردا یاتوبسان کول اوتورموش ماه رخساره

الیم چاتمور سیلم قارداش یوزوندن اول کولی قانی

سسون یتجاق قولاقیمه منه بیر تازه جان گلدی

هامی ناقه نشین اطفالیدن آه و فغان گلدی

یوزومه قلبیمون قانی اولوب اشک روان گلدی

گوزومدن یم کیمی موج ایلدی ایسلاتدی دامانی

دلون قربانیم قارداش اوخی سن آیه ی تطهیر

اوخی سن نیزه ده، منده ایدوم اول آیه نی تفسیر

ایشیتسون ایتمه سین بو قوم سنگین دل بیزی تکفیر

آتوبلار دین و ایمانی دانوبلار اصل قرآنی

دوادور صوت قرآنون تماماً هر دل ریشه

گوروم لعنت ایده ا... حسین بو قوم بدکیشه

خیالی وار وورا چون ریشه ی آل اللهه تیشه

گوروم محو ایلسین قهراً خدا بو آل سفیانی

مسیحه دم ویرن، دم ویر منه سن ایمدی عیساسن

منم چون آذر بیجان، قیل احیا سن مسیحاسن

کانّه طشت زر ایچره کسیلموش باشی یحیاسن

کسیلمور نوک نی دن متّصل جاری اولور قانی

گوروم رحمین کسه بو قومیدن خلّاق بی همتا

چخوبلار پیشوازه ایلیوبلر گور نجه غوغا

بَری دیندن اولانلار بیزلری کافر بولور حتّی

بولولّر خارجی طاها دینیندن آل طاهانی

باجون دیندیرمیسن دیندیرمه، واردی صبری بیر دریا

بویور ناقه نشینلر عترت زهرا دگول آیا

دانیشدور بو بالا نازلی قیزون ای سرور بطحا

دوزنمور، ترک ایده جسمین او قدری قالموری جانی

گورورسن اهل کوفه ظلمینی، یوخ شرحینه حاجت

سنی اُلدوردولر کرب و بلاده تاپدیلار جرات

یریش گتدی خیام اوسته ایدوبلر عترتون غارت

ووروبلار اود، یانوب خرگه، دوتوب توسّی بیابانی

اورگیم ایستمور شرح ایلیم بیر شمّه غارتدن

نجه غارت دیوم قارداش علامتدور قیامتدن

و یا اود وورمادان، خیمه آلیشماقدان جسارتدن

دیوب یاندورمارام نار غمه اول قلب سوزانی

امام امر ایلدی قیزلار داغیلدی چوللره بیر باش

قاچان قاچدی، قالان وحشی عربدن گوردی چوخ پرخاش

عمو، عمّه، بابا سسلوردی بعضی، بعضیلر قارداش

حریره ناز ایدنلر مسکن ایتدی غملی صحرانی

یانان بیر خیمه نصب ایتدیم کنار نهر علقمده

جمع ایتدیم باشیمه باشسیزعیالون اول چتین دمده

سنه شام غریبان ساخلادیم گوردون نه عالمده

رباب و لیلی اولموشدی او بزم غم نواخوانی

سحر اولدی دوشوبدور باشیمه بیر غصّه لی سودا

گیدوم فکر ایلدیم ایلوم عزیز جانیمی پیدا

یتیشدیم بیر چوخور یرده نه گوردوم قاندی بیر دریا

ایله حالیم پوزولدی نطقیدن دوشدوم حسین جانی

دولاندیم قتلگاهین دوره سین رفتاریدن قالدیم

او یردن هم سنون همده آنامین عطرینی آلدیم

جنازندن نشانه اول چوخور یرده اله سالدیم

کنار ایتدیم وجودوندان قلج، داش، نیزه، پیکانی

قباق گون بولمدیم قاتل سنی سالموش یوزون اوسته

گل اوستن خار تک اوخلاری چکدیم دسته به دسته

گوتوردوم اللریم اوسته، چووردوم آرخاوین اوسته

دوباره باغریما باسدیم حسین اول جسم عریانی

نچه ساعت صورا فریاد ایدوبدی شمر بی ایمان

سوار اولسونلا فوراً ناقیه اطفال سرگردان

سوار اولدی بیرعدّه ناقه اوسته یاحسین گویان

توکوبله گوزلریندن عارضه چون ابر بارانی

خبر گتدی عدودن بیر نفر اول شمر نادانه

حسین گنجینه سی اوسته گلوب بیر گوهر افغانه

حسین نه ال چکور اوندان، حسیندن نه او دردانه

او غملی منظره حیران قویوبدی قوم عدوانی

اله قمچی آلوب ظالم مروّتدن او یان دوردی

کانّه جنگ ایدور کافر، باشی اوسته دولاندوردی

اشاقه یندیرنده خیرۀ النّسوانی یاندوردی

دگنده اول قیزا قان ایتدی قلب شیر یزدانی

غرض قمچی آیردی ظلمیلن اول پاره پیکردن

دونوب بیر خواهش ایتدی یانه یانه اول بداختردن

دیدی ویر بیر اجازه ایلیوم دیدار اصغردن

وداع ایلوم بو آخِر دمده اول طفل لب عطشانی

اجازه صادر اولدی اصغری تاپدی او اثناده

قولون آچدی باشین قویدی قول اوسته گلدی فریاده

نه عالملر اولوب، ای دل بو سرّی بولمه چوخ ساده

فرات اوسته دوتوب یوز سسلدی فریاده سقّانی

غرض میندیردیلر تا کاروان دوشدی یولا گیتدی

توکندی یول بو گونده کاروان تا کوفیه یتدی

بیزی بو کوفه نین اهلی نه نوعی پیشواز ایتدی

ایدوبلر ناقه لر اوسته عیالون سنگ بارانی

بو ظلمین آتشیندن اود دوتوبدور اودلانور زینب

گورور اشراریدن ظلم و جفا آسان سانور زینب

شماتت ایلین عورتلری قبلاً تانور زینب

بولار اولموش سبب اشکیم ایدور شرمنده دنیانی

یتوب یعقوبینون آتمیش بشه سنّی بو عالمده

بیزه خدمت ایدوب دائم، نه تک ماه محرّمده

سمندر تک یانور قلبی بولورسن آتش غمده

غلام درگهوندی ایلمه مایوس او نالانی

نوشته شده در تاریخ یکشنبه 16 مهر 1396    | توسط: خادم حضرت علی اصغر (ع)    | طبقه بندی: احوالات ورود به کوفه،     |
نظرات()