قیل تلاوت نیزه ده قرآنی سن قارداش حسین

ناقه ده تبلیغ ایدوم اسلامی من قارداش حسین

سس ویر بلالی زینبه- باشی بلالی زینبه

ادامه در ادامه ی مطلب

قیل تلاوت نیزه ده قرآنی سن قارداش حسین

ناقه ده تبلیغ ایدوم اسلامی من قارداش حسین

سس ویر بلالی زینبه- باشی بلالی زینبه

حقّی ایداخ قارداش باجی- گون تک علن قارداش

سن کلام اللهی باشلا لحن شورانگیزیله

منده تبلیغات ایدوم بیر نطق آتش بیزیله

کوفه شهرین دولدوراخ بیر شور نهضت خیزیله

تحت تاثیره گله اهل فتن قارداش حسین

گل ویراخ سن نیزه ده من ناقه اوسته ال اله

قویمیاخ یتسون خلل حکم کلام  منزله

بولدوراخ خلقه ندور هر یرده اصل مسئله

قالماسون ناحقّ و حقّی بولمین قارداش حسین

بیر ایشیقلی گوندی باشون نیزه لر باشی فلک

قانلی باشلار دوره ده اولدوزدی آیدی تک به تک

واردی باشیمده منیمده قرخا دین قاره لچک

سایه تک آردونجا گلّم شامه من قارداش حسین

کوفیه بولدون گلور بو زینب بی خانمان

پیشواز ایتدون کسوک باشیله ای جان جهان

زینبون اُلسون ندور گل عارضونده تازه قان

اولدی باغریم قان بو خون تازه دن قارداش حسین

نه روادور گر یولوندا عمریمی قورتارماسام

نه وفادور سنله همرنگ اولماقی آختارماسام

نه محبّتدور سنون تک باشیمی من یارماسام

گیزلین عشقی ایتمسم بو گون علن قارداش حسین

اوز وفامی من بو گون دنیایه اعلان ایلرم

باشیمی محملّه یارّام خلقی حیران ایلرم

بو آغارمیش زلفیمی قانیله الوان ایلرم

تا سنه همرنگ گورسون هر گورن قارداش حسین

جمع ایدوبسن باشیوه سن باطراوت گل لری

آلموشام منده کناره خوش نوا بلبل لری

حالی پوزون خسته یورقون سینه ده نسگل لری

یاخشی ایلوب بلبل و گل انجمن قارداش حسین

هر یارالی باش اولوبدور بیر آنانین منظری

چوخ پوزار بو عالم امّا لیلی غم پروری

دائماً اکبر یوزونده قالموش آغلار گوزلری

آغلادور دنیانی بو اوغلی اُلن قارداش حسین

بیر گوزل گوز که هامی جادوسینه مفتون اولا

هر تماشاسینده دللر لاله تک پرخون اولا

حقّی وار اوغلی اُلن لیلا اگر مجنون اولا

مسکنی دائم اولا دشت و دمن قارداش حسین

عارض قاسم ایدر جلوه بهاری گل کیمی

طرّه ی شبرنگی اطرافی دوتوب سنبل کیمی

وار یری گلسه آناسی نالیه بلبل کیمی

گورسه هر یرده گل و سرو و سمن قارداش حسین

حالینه آغلار آناسی چوخ باخار آغلار یانار

یاندیروب آفاقی حسرتله یاخار آغلار یانار

بوینی چیگنینده یوزه اشکی آخار آغلار یانار

حسرته قلبی اولوبدور مُرتَهَن قارداش حسین

درک ایدر گوز قرص مه تک بیر ایشیقلی اختری

عارضه افشان اولوب قانه بویانموش تِل لری

باغری قان ایلر تماشاسی رباب مضطری

چون صدف گوزدن توکر دُرّ عدن قارداش حسین

تیر حسرت داغدیده سینه سین ازبس دلر

دمبدم خون جگر غربال چشمیندن الر

بیر بالاسی اولانان آهو کیمی دائم ملر

گورمیوب اصغر کیمی آهو ختن قارداش حسین

شاد اولوب گولمز داخی گر مینلریله گل گوله

مین بهار اولسا یقین ایتمز نظر گل سنبله

نه یوزیله بیرده اصغرسیز باخار غنچه گله

هاردا وار اصغر کیمی غنچه دهن قارداش حسین

وار یری خون دله گر قاتسا زینب گوزیاشین

باوفا عبّاس تک قویمازدی هرگز قارداشین

گورمورم علّت ندور قارداش علمدارین باشین

آیریلوب اول باوفا سندن ندن قارداش حسین

ای هدایت نیّری رخشنده ماهون هاردادی

دائماً آرخان اِئلون پشت و پناهون هاردادی

لشکری مغلوب اولان شه سرسپاهون هاردادی

وای منه هاردا قالوب اول ممتحن قارداش حسین

من دیمم بیر گوز دولاندور زینب بی یاره باخ

نه منیم احوالیمه نه عترت اطهاره باخ

گردنینده غلّ جامع عابد بیماره باخ

گور نه احواله قالوب اول خسته تن قارداش حسین

بو رعیّت گور نه مظلوم ایلیوب شاه اوغلونی

دست بسته ساخلیوب محزون یدا... اوغلونی

ایلسونلر شاد هندین شوم و گمراه اوغلونی

یوخ بیله بیر ملّت پیمان شکن قارداش حسین

نه روادور بیر امام خسته تبدار و ضعیف

ناقه سی عریان و بدرفتار اولا چوخ چوخ نحیف

گون قاباقی سایبان یوخ، جسم اوزی گلدن لطیف

یوخدی بو بیماره بیر رحم ایلین قارداش حسین

من دیمم لازمدی ایتسونله طبابت ناخوشا

من دیمم اولسون فراهم استراحت ناخوشا

ایتمسونلر لامحاله چوخ شماتت ناخوشا

باغریقان اولدی بو رنجور محن قارداش حسین

بو صغیره قیز گلوبدور گور نجه نی تک دله

سنده دور دائم گوز اشکی آخار بی فاصله

بیر دانیشدور گوگلون آل بو باغریقانه لطف ایله

تلخکام غمدی بو شیرین سخن قارداش حسین

سهلدور اشکون حسینیم گوزده قانه قاتموسان

خطّ و خالون اشک خون آلودیله ایسلاتموسان

وای منه یوخسا باجون اُلسون کول اوسته یاتموسان

کول لره باتموش بیله وجهُ الحسن قارداش حسین

ای اولان مهر و وفا چرخینده بدر کاملیم

عارضون دوتقون گورنده دلده آرتار نسگلیم

نه یتور بو ال کولی گل تک جمالوندان سیلیم

وار نه بیر مرآت رخسارون سیلن قارداش حسین

اولدی همدم تائبه بیر نوحه خوان آدی کریم

رشته ی نظمه دوزولدی بیله بیر دُرّ یتیم

آرزو ایله لّه قبرون ای کریم اوغلی کریم

ایسته باهم قبریوه بیر وقفه سن قارداش حسین

نوشته شده در تاریخ یکشنبه 16 مهر 1396    | توسط: خادم حضرت علی اصغر (ع)    | طبقه بندی: احوالات ورود به کوفه،     |
نظرات()