غم گونونده دردیمون غمخواری زینب آچ گوزون

بو دل بی تابیمون دلداری زینب آچ گوزون

ادامه در ادامه ی مطلب

غم گونونده دردیمون غمخواری زینب آچ گوزون

بو دل بی تابیمون دلداری زینب آچ گوزون

ای اولان هر دردیمه هم راز و هم آواز اویان

آچ گوزون بیرجه بو قدری ایتمه خواب ناز اویان

آز قالور روحیم قوشی ایتسون منیم پرواز اویان

دوتدی سوزش بو دل پرناری زینب آچ گوزون

دور آنام صدّیقه ی کبری یرینده جانشین

مصطفی اولادینه مادر کیمی یار و معین

عاقبت قارداشیوه ایچدیردی دشمن زهر کین

ای حسینیله حسن غمخواری زینب آچ گوزون

دور ایکی قارداش باجی کامیمجه آه و زار ایداخ

من سنیله، سن منیله ای باجی گفتار ایداخ

آخِر عمریمدی گل صون دمده بیر دیدار ایداخ

کشف ایدوم قلبیمده کی اسراری زینب آچ گوزون

نصف شب اولدی عطش ازبس منه غالب باجی

ناگهان سوءالقضا باش ویردی بس جالب باجی

باشه لاجرعه چکوب اولدوم اوزوم شارب باجی

سالدی اوزگه حاله بو دل زاری زینب آچ گوزون

اود دوتوب یکسر وجودیم یاندیم اودلاندیم هرای

یاندیم اودلاندیم جگرلردن الولاندیم هرای

ای آنام باجی گوزون آچ گور نجه یاندیم هرای

گور بو قلبیمده اولان اودلاری زینب آچ گوزون

بسکه بو زهر جفا بو قلبیمه تاثیر ایدوب

قان اولوب باغریم توان و طاقتیم الدن گیدوب

ایله چاره دردیمه گل، جان دوداقیمه یتوب

قارداشون یوخ حالت گفتاری زینب آچ گوزون

آتش زهر جفا قلبیمده زینب جوش ایدر

بو بلالی قارداشون بی تاب ایدر مدهوش ایدر

عمریمون شمعین گلر دست اجل خاموش ایدر

شمعیوین پروانه ی غمخواری زینب آچ گوزون

دور خبر ویر بیر به بیر ای باجی آل هاشمه

هم اوزون گل هم خبر ایله حسین قارداشیمه

نازنین اطفالیمی جمع ایله بیرده باشیمه

گوروسون اطفالیم من بی یاری زینب آچ گوزون

بو قویسِیدون بو شاهین قبرینه قاره یوزون

دولدوراردون واحسن دلده سرشکیله گوزون

ذکر ایدردون بیرده آخِرده همان اوّل سوزون

غم گونونده دردیمون غمخواری زینب آچ گوزون

نوشته شده در تاریخ سه شنبه 9 آذر 1395    | توسط: خادم حضرت علی اصغر (ع)    | طبقه بندی: اشعار مدح، میلاد و شهادت حضرت امام حسن مجتبی (ع)،     |
نظرات()