دور ای بلا و مصیبتلر آشناسی باجی

گوز آچ اویان باشیوین باشلانوب بلاسی باجی

ادامه در ادامه ی مطلب

دور ای بلا و مصیبتلر آشناسی باجی

گوز آچ اویان باشیوین باشلانوب بلاسی باجی

حیات شمعی خموش اولدی قارداشون حسنین

سولوبدی گلشن عمری گیدوب صفاسی باجی

ویروبله زهر جفا قان دوروب دوداقیمده

نجه یانور دیمورم سینمون یاراسی باجی

شهادتیم باجی بو زهریله یقین اولدی

هزار شکر که دینین وار اعتلاسی باجی

دایانما دور باجی جان اهل بیته ایله خبر

دی قارداشون حسنین وار نه ابتلاسی باجی

همیشه اهل ولانین بلایه الفتی وار

بلاسی وار بلی وار هر کیمون ولاسی باجی

بو کوزه دن بو سودان ایچموشم یانور جگریم

محالدور اولا بو دردیمون دواسی باجی

هانی آتام هانی جدّیم هانی آنام زهرا

فنادی هر کسه اولماز جهان بقاسی باجی

اگر بلائیله تخمیر اولوبدی زینب آدی

عجب دگل بو آدین واردی چوخ بلاسی باجی

ایاقه دور باجی ویر حالیمی حسینه خبر

گلوب گوره حسنین وار نه ماجراسی باجی

دی قاسمیم گله بیر گل یوزون دویونجا گورم

فراهم اولدی منه آخرت اساسی باجی

بو سخت وقتیده چوخ خوشدی اوغلوم عبدا...

گله کناریمه اول گوزلریم ضیاسی باجی

دیم که کیمدی ابوالفضله قاتلیم هیهات

صلاحدور منه بو مطلبین خفاسی باجی

بو سرّی قبره آپارّام ولی جهاندا اونون

گوزینده تار اولاجاق عالمین فضاسی باجی

جهاندا باغریمی قان ایتدیلر منافقلر

چون آشنالریمون اولمادی وفاسی باجی

نه قدر ویردیله زحمت دوزوب دایاندیم من

اولوب او صبر و تحمّلده حق رضاسی باجی

او کوردل که گوز کوریدی بصیرتی تک

یوخیدی عاطفه سی اولمادی حیاسی باجی

ایاقیمی ایله ایتدی عصائیله مجروح

هنوز وار اثر زخم نارواسی باجی

جهان منی ایله مظلوم روزگار ایلدی

بو امّتین منه سلب اولدی اعتناسی باجی

نه بیر حیاتیم اُلندن صورا جهاندا منه

اولار نه ناله سی نه بیر کسین نواسی باجی

علاوه نعشیمی اوخلار بنی امیّه، چخار

سپهره عترت اطهارین آه و واسی باجی

بو آستانه قویوب یوز امیدیله خوندل

گر اولسا خدمتینون ارزش و بهاسی باجی

حضور حضرت موسی الرّضاده بو اثری

یازاندا خامه ی ناچیز و نارساسی باجی

دیردی قبریوه قربان اولوم عنایت ایله

هامی مریض لرین سیزده وار شِفاسی باجی

نوشته شده در تاریخ سه شنبه 9 آذر 1395    | توسط: خادم حضرت علی اصغر (ع)    | طبقه بندی: اشعار مدح، میلاد و شهادت حضرت امام حسن مجتبی (ع)،     |
نظرات()