ای آنام زهرا نشانی وقت هجراندور باجی

اود دوتوب قلبیم یانور، حالیم پریشاندور باجی

ادامه در ادامه ی مطلب

ای آنام زهرا نشانی وقت هجراندور باجی

اود دوتوب قلبیم یانور، حالیم پریشاندور باجی

عهد آلان گون عالم ارواحیده حیّ غفور

ویرموشم دل هر بلا گلسه اولام دلدن صبور

دوزدوم آخِر بیله سرگرم ایتدی مینای حضور

حالتیم ایفای عهده یاخشی میزاندور باجی

روز اوّلده مشیّت ایلمیشدی اقتضا

سو ایچم بو کوزه دن اولسون باجی جام بلا

یاخشی سالدی صورته معنانی بو زهر جفا

فصل فرقتدور، فصول عشقه پایاندور باجی

بو نه خواب نازدور دور ای بتوله یادگار

کج مدار ایتدی منیله بیرده چرخ کجمدار

زهریدن اودلاندی قلبیم دشمن اولدی کامگار

دور شرار غمله سنده قلبیوی یاندور باجی

دشمنین مخفی ایدن ظلمی اولوب گون تک علن

لبلریم قانیله اولدی رشک یاقون یمن

بو گل عمریم ایله سولدی سموم زهریدن

مین بهار اولسا بو گل پژمرده خنداندور باجی

بس دگل باجی منی بیر عمر مغموم ایتدیلر

حقّیمی الدن آلوب ظلمیله مسموم ایتدیلر

قلبیمی یاندیردیلار آخِرده مسموم ایتدیلر

لاله تک باغریم بو امّتدن منیم قاندور باجی

ای باجی دور ویر خبر بو حالی آل هاشمه

مهربان قارداشلاریم جمع اولسون ایمدی باشیمه

حالیمی امّا دیمه واضح حسین قارداشیمه

روحی چون روحیمدی، منله جانی بیر جاندور باجی

ایسته سن بو خسته دل بیر استراحت ایلسون

سویله گلسون قاسمیم بو غمده شرکت ایلسون

باشیم اوسته اگلشوب قرآن تلاوت ایلسون

راحت روحیم منیم چون صوت قرآندور باجی

آب اولار هر آهنین دل گورسه سوز آهیمی

رهنمای عشق آچوب کوی نگاره راهیمی

مایلم بیرده گورم گل یوزلی عبداللهیمی

چون جمالی چرخ عمره ماه تاباندور باجی

ثبت ایدن گون منشی غم ابتلا طغراسینی

منده جانانیله ایتدیم نقد جان سوداسینی

آلموشام بیر عمر گلدوقجا بلا کالاسینی

دویموشام جاندان گوگل مشتاق جاناندور باجی

من دیمم پیمان دلداری فراموش ایلدیم

قلبیمی تیر ملال و محنته توش ایلدیم

عاقبت بو کوزه دن جام اجل نوش ایلدیم

ظاهراً سو باطناً بیر نار سوزاندور باجی

ای عزیز جان زهرا وی امام ممتحن

گوشه ی چشمیله باخ خوندلدن ایت رفع محن

بیرده مقبول ایت گلن بو کمترین اشعاری سن

ای آنام زهرا نشانی وقت هجراندور باجی

نوشته شده در تاریخ سه شنبه 9 آذر 1395    | توسط: خادم حضرت علی اصغر (ع)    | طبقه بندی: اشعار مدح، میلاد و شهادت حضرت امام حسن مجتبی (ع)،     |
نظرات()