آچ گوزون بیر دور ایاقه لبلریم دوغراندی زینب

بو سویی ایچدیم وجودیم اود دوتوب اودلاندی زینب

ادامه در ادامه ی مطلب

آچ گوزون بیر دور ایاقه لبلریم دوغراندی زینب

بو سویی ایچدیم وجودیم اود دوتوب اودلاندی زینب

بو گجه فکر و خیال حضرت جانانلا یاتدیم

خوابیدن بیدار اولوب دنیانی یکسر گوزدن آتدیم

باشیمه لاجرعه چکدیم زهری، بزم وصله چاتدیم

انبیا و اوصیا بو حالیمه حیراندی زینب

بیله جان ویرماق ازلدن مشق اولوبدور اهل عشقه

ترک جان عالمده درس عشق اولوبدور اهل عشقه

عشقیده اولماق فنا سرمشق اولوبدور اهل عشقه

بو فنالیق مرده جسمه بیر علاوه جاندی زینب

دور آنام باجی دایانما ویر خبر گلسون حسینیم

جسمیمه بیر تازه جاندور چون او شاه مشرقینیم

گلمسه اودلار یقین آفاقی سوز شور و شینیم

گوزلریم یولدا قالوبدور موسم هجراندی زینب

آچدی ناگه گوزلرین زینب، باتوب بحر ملاله

ووردی باشه، یولدی زلفین، آغلادی گلدی سواله

عرض قیلدی کای برادر کیمی سنی سالدی بو حاله

اود دوتوب بو حالیدن آخِر آلیشدی یاندی زینب

ایلدی فرمایش اول شه آز بو قلبون داغلا باجی

آچما باشون، یولما زلفون، صبر قیل آز آغلا باجی

جان دوداقیمه یتیشدی گل گوزیمی باغلا باجی

شاهباز مرگه بو روحیم قوشی اولاندی زینب

بو بلالی باشیوین عالمده چوخ چوخدور بلاسی

باشه یتمز کربلاده وار بیر اوزگه ماجراسی

دستگیر غم سنی ایلر او گون بو عشق اساسی

که حسین جسمین گوررسن زینب میداندی زینب

آه او گوندن کربلاده زینبین گلزاری سولدی

بلبلان گلشن حق دستگیر دشمن اولدی

دمبدم پیمانه تک خوناب غمدن قلبی دولدی

عاقبت زنجیر ظلمه ظلمیله باغلاندی زینب

دوردی بیر قدری یارالی جسمینه حسرتله باخدی

خون دل جوشه گلوب تا چشمه ی چشمیندن آخدی

گوتدی قارداش قانینی هم زلف و هم رخساره یاخدی

عرض ایدوب قارداش نجه گور مایل جاناندی زینب

آتش ظلمه بو گون بو دشت پروحشتده یاندیم

هر بلا یوز ویردی دوزدوم هر ستم یتدی دایاندیم

عاقبت منده سنون تک گور نه بو قانه بویاندیم

لطف ایدوب دیندیر باجون، بیر آن سنه مهماندی زینب

سنده اول یکدل سهیلی دامن مقصوده وور چنگ

عاشق صادق گرک یکدل اولا جانانه یکرنگ

یکدل اولسان هر قدر اولسا گناهون اولما دلتنگ

هول محشردن سنی قورتارماقا عنواندی زینب

نوشته شده در تاریخ سه شنبه 9 آذر 1395    | توسط: خادم حضرت علی اصغر (ع)    | طبقه بندی: اشعار مدح، میلاد و شهادت حضرت امام حسن مجتبی (ع)،     |
نظرات()