ظلمیله مسموم اولموشام ای مظهر زهرا باجی

الدن آلوب آرامیمی بو زهر جان فرسا باجی

ادامه در ادامه ی مطلب

ظلمیله مسموم اولموشام ای مظهر زهرا باجی

الدن آلوب آرامیمی بو زهر جان فرسا باجی

زهر هلاهل ایچدیروب قارداشیوه اهل جفا

دور گور نه حاله قالموشام ای کوکب برج وفا

یاندیم یاخیلدیم قالمادی عمریم بهارینده صفا

من ناله ایلوم، سنده دی گوزیاشلی واویلا باجی

زهرایه بنزر گوزلرون دولدورما چوخ دریا کیمی

آز قطره قطره گوزیاشون توک لولوءِ لالا کیمی

مرضیّه دن سود امّوسن، مرضیّه اول زهرا کیمی

ایتسون مبادا صبریوی دست بلا یغما باجی

ایلوب مشیّت اقتضا مسموم اولوب دلدن یانام

ا... یولوندا صبر ایدم هر مشکلی آسان سانام

قالمور آنام درده یته، سن هم باجیمسان هم آنام

سنسن آنام تک دردیمی آلماقلیقا اولی باجی

باخما دولی گوزلی بیله مسموم اولان قارداشیوه

ایمدی دایان دور، یتمسون غمله گره خم قاشیوه

مندنصورا غم یاغدورار دنیا بلالی باشیوه

هر یانه گیتسن سنله وار درد و غم دنیا باجی

بیر یاندا گلموش نالیه آغلار یانار اوغلوم حسن

بیر یاندا عبدا... اولوب سرگشته پابند محن

بیر یاندا حسرتله باخور بو قاسم گل پیرهن

مینلرله حسرت یاغدیرور ایتدوقجا هر ایما باجی

گاهی قویور دیواره یوز، اشکین عذاره باغلوری

گاهی یتیمانه باخور قلب جهانی داغلوری

قویمور اوجادان آغلاسون شرمی، صداسیز آغلوری

وقریله ایلور عفّتین اثبات او مه سیما باجی

آل زینب زهرا شیم بیر آن دیز اوسته باشیمی

یغ باشیوه بو صحنه ی غمده سن آل هاشمی

آگاه قیل بو حالیدن بیرده حسین قارداشیمی

صون دمده یتسون دردیمه اول سرور بطحا باجی

یردن گوتورسون نعشیمی مهریله اول جان جهان

دوزسون دایانسون دشمنیم گر ایتسه طعن بی امان

تابوتیده اعدا منی یتمیش اوخا ایتسه نشان

اقدام دعوا ایتمسون صبر دل زهرا باجی

بوردا دایانسون داشماسون هرچند خصم ایذاسی وار

امّا قاباقدا باشینون طاقت شکن غوغاسی وار

طاقت شکن غوغائیله تشکیل عاشوراسی وار

تاریخ عاشورا یازار غوغای عاشورا باجی

غم لشکری مندنصورا اطرافیوی محصور ایدر

بار غم دورِ زمان قدّون بوکر رنجور ایدر

جبر فضا امر قضا آخِر وطندن دور ایدر

کرب و بلا صحراسینه آخِر چکر اعدا باجی

کرب و بلا صحراسینی ازبس دوتار اهل جفا

یوز مین قوشون قان قان دیر، امّا حسین بی آشنا

سانسیز وورار یاره اونا ظلمیله قوم اشقیا

مجروح مرکبدن دوشر شاهنشه بطحا باجی

قان ایچره مستولی اولار بسکه اونا سوز عطش

سانسیز یارالی جسمیله قاتل لر ایلر کشمکش

غلطان اولار اوز قانینه سسلر حسینیم العطش

سو ایستیر، یاره وورار شرار بی پروا باجی

ظلمیله قوم اشقیا کام دلین ایلر حصول

آتدان تراب اوسته دوشر لب تشنه فرزند رسول

اول پیکر صد پاره ده آت گزدیرر قوم جهول

عیناً همان ساعت اولار محشر سنه برپا باجی

بیر عمردور بو پیر اولان تائب بیزه وابسته دی

یکرنگ دور یکروی دور،‌گفتاری بیر سوز اوسته دی

امّا جوان داغی اونی جاندان سالوب دلخسته دی

صبر ایلسه ا... اونا پاداش ایدر اهدا باجی

نوشته شده در تاریخ سه شنبه 9 آذر 1395    | توسط: خادم حضرت علی اصغر (ع)    | طبقه بندی: اشعار مدح، میلاد و شهادت حضرت امام حسن مجتبی (ع)،     |
نظرات()