گل بقیعه یاعلی ای تاجدار مجتبی

گون قباقینده قالوب پوزقون مزار مجتبی

ادامه در ادامه ی مطلب

گل بقیعه یاعلی ای تاجدار مجتبی

گون قباقینده قالوب پوزقون مزار مجتبی

ایسته دربار ربوبیّتدن ای شاه نجف

ذوالفقار آلسون اله اوغلون ولیّ متّصف

انتقام آلسون منافقلردن اول کان شرف

قالماسون مسموم اورکده آه و زار مجتبی

هاردادور اولمور ندن ظاهر امام منتظَر

ایلمور قبر شریف مجتبایه بیر نظر

وار یقینیم ذوالفقاره گوز تیکوب قانیاش توکر

یاد ایدر اولموش خزان جبراً بهار مجتبی

من نجه تقریر ایدوم دشمنلرین بو جبرینی

شیعه نین الدن آلوبلار ظلم الیله صبرینی

گون قباقینده قویوبلار دورت امامین قبرینی

اول ائمّه که اولوبلار همجوار مجتبی

آل طاهانی اگرچه اشقیا مهموم ایدوب

ظلمیله هر تک تکین بیر نحویله مغموم ایدوب

لیک امام مجتبانی چرخ چوخ مظلوم ایدوب

دُرّ اشکیله دولوب دائم کنار مجتبی

بس دگولدی گوردی اوز حال حیاتینده جفا

ایتدیلر حال مماتینده بو ظلمی اشقیا

هم حیاتی هم مماتی اولدی یکسر ابتلا

دولدی قانیله دل دریا مدار مجتبی

مدّت عمرینده بیر گون گل عذاری گولمدی

آه و واویلا که دردین بیر کس اصلا بولمدی

حالت مرگینده ده عادی اُلومله اُلمدی

عالمه اود ووردی آه پرشرار مجتبی

نچّه دفعه اولدی مسموم اول عزیز بوتراب

ایتدی آخِرده ولی زهرانی جعده دل کباب

ویردی بیر زهر اول شهه سالدی بهشته انقلاب

سوده ی الماسیله گیتدی قرار مجتبی

بولمورم یارب نه نوعی زهریدی اول زهر کین

قلبی یاندی، سبز رنگ اولدی وجود نازنین

ال اورکده، دیده گریان، دلده فریاد و انین

سسلدی باجی اویان ای غمگسار مجتبی

لبلریم یاندی اویان ای یادگار فاطمه

آز قالور دونسون خزانه نوبهار فاطمه

وار یری عرشه اوجالسون آه و زار فاطمه

وای اوغول وای سسلسون جدّ کبار مجتبی

یاتما دور ایله نظر بو قان اولان گوزیاشیمه

باد ظلم اسدی گل گلزار آل هاشمه

ویر خبر باجی ابوالفضل و حسین قارداشیمه

قالماسون یولدا بو چشم انتظار مجتبی

آلدی تا قارداش صداسین خوابیدن زینب دوروب

گوردی خورشید امامت آز قالور ایتسون غروب

باش آچوب، گوزیاشینی توکدی، یوزه سیلی ووروب

دُرّ اشک چشمینی ایتدی نثار مجتبی

عرض ایدوب نولموش سنه آغلار گوزون قربانی من

یوخسا زهر کین ویروبلر تازه دن قارداش حسن

قان آخور لعل لبوندن ای آنام اوغلی ندن

زینبی یاندوردی قلب داغدار مجتبی

قولّارین آچدی او خورشید خدارت احتجاب

سالدی قارداش بوینونا قول زینب علیا جناب

سسلدی اُلسون باجون ای نور چشم بوتراب

اشکیله ایسلاندی بو سوزدن عذار مجتبی

بیرده قارداش بوینونا عالمده زینب قول سالوب

ساکنان بارگاه قدسیدن آرام آلوب

بولمورم کرب و بلا مظلومی نه حاله قالوب

ناله ده اولدی آناسی جدّی یار مجتبی

سویلدی اولسون باجون قربان بو قان گوزیاشیوه

ایمدیکه مهمان گیدورسن مجتبی قارداشیوه

گل بو غملر یورقونی زینب دولانسون باشیوه

گیت بویون قربانیم ای یادگار مجتبی

وار قباقدا صابرا بیر گون به سان لیل تار

کائناتین قلبینی اول گون غبار غم دوتار

ایسته سن گر دوتماسون قلبون او گون غمدن غبار

قلبیوه قونسون گرک بو گون غبار مجتبی

نوشته شده در تاریخ سه شنبه 9 آذر 1395    | توسط: خادم حضرت علی اصغر (ع)    | طبقه بندی: اشعار مدح، میلاد و شهادت حضرت امام حسن مجتبی (ع)،     |
نظرات()