نوش ایدوب اوغلون تقی جام اجل یا فاطمه

باشیوه دور قاره سال بغداده گل یا فاطمه

ادامه در ادامه ی مطلب

نوش ایدوب اوغلون تقی جام اجل یا فاطمه

باشیوه دور قاره سال بغداده گل یا فاطمه

ایستدی بیر شاخه گل باغ امامتدن کسه

محرمی ایتدی جفا بو نوجوان بی کسه

ناله سی شمس الشّموسین چخدی چرخ اطلسه

وای اوغول وای سسلدی صبح ازل یا فاطمه

گرچه اهل عترتون اهل جفا مظلوم ایدوب

لیک بو اوغلون غمی عالملری مغموم ایدوب

من دیمم اوز عورتی نه نوعیله مسموم ایدوب

پرده ده لازمدی قالسون بو عمل یا فاطمه

چوخ آز عمر ایتدی جهاندا بو سمیّ مصطفی

اولدی آز عمریله امّا چوخ بلایه مبتلا

گاه توهین ایلدی گه دوغرادی اهل جفا

بلکه ایتسونلر شئونین مبتذل یا فاطمه

قلب عالم قلبینی تا دخت مامون داغلادی

قویدی یالقوز ایوه بو شاهی قاپونی باغلادی

وا اماما سسلدی سکّان افلاک آغلادی

ویردی یالقوز جان حبیب لم یزل یا فاطمه

یوز قویوب دیواره گه سولموش دوداقلار غنچه وش

بیربیره لمس ایلیوب گاهی دیردی العطش

کربلا مظلومی تک جان اوسته گه ایلردی غش

گه دونردی صاق صولا قلبینده ال یا فاطمه

بیر کنیزی غم احاطه ایلدی چون دایره

الده بیر کاسه گلوب مظلوم امامه سو  ویره

امّ فضل آلدی الیندن کاسه نی چالدی یره

تشنه جان ویردی اولوب عکس العمل یا فاطمه

امّ فضل بیحیا تا حاصل ایتدی مدّعا

بامه حمل اولدی جنازه آه یا خیرالنّسا

نولدی بولمم، کوچه ده قالدی امام الاتقیا

گون ایوی گل جسمینه اولدی محل یا فاطمه

قالدی اوچ گون یرده نعش سرور ابرار زار

وارث اولدی جدّینه بو نوجوان گلعذار

سرور مظلومیله امّا بونون چوخ فرقی وار

یوخ مصیبتده حسینه بیر بدل یا فاطمه

گرچه اوچ گون کوچه لرده قالدی بو اوغلون تقی

اولمای مُثله ولی جسم تقیّ متّقی

آه او گوندن کربلا دشتینده اشرار شقی

تاپدی جرات ختم اولا ساعت جدل یا فاطمه

تا اله گلدی عمر سعد جفاجو مطلبی

امر ایدوب ایتسونله مُثله اول وجود اطیبی

داغدار ایتدی بو غم قلب جناب زینبی

اللری باشدا دیدی فریاده گل یا فاطمه

ایتدیلر قربان کیمی قسمت حسینین پیکرین

ساربان بیحیا کسدی بیلکدن اللرین

بجدله بذل ایلدی انگشتیله انگشترین

قانلی باشه شامه گزدی ال به ال یا فاطمه

ایلدی اعراب وحشی آل طاهانی اسیر

کوفه و شامه آپاردی قیزلارون قوم شریر

هانسی قانون بیر بیله ظلمی بولر آیا جدیر

شاهزاده طاهرات عریان جمل یا فاطمه

نوکرون صابر خانم یا فاطمه دلخون اولوب

بیر اوزون مدّتدی ناکس کسلره مدیون اولوب

فکری پوزقون روحی خسته محنتی افزون اولوب

بورجی دورت یوز مین ریالدور ماحصل یا فاطمه

نوشته شده در تاریخ دوشنبه 23 شهریور 1394    | توسط: خادم حضرت علی اصغر (ع)    | طبقه بندی: احوالات در میلاد مدح و شهادت امام جواد ال ائمّه (ع)،     |
نظرات()