جان کشتیسی غرق اولوب بلایه دریای مصیبتیمده قارداش

آخِر نفسیمدی گل هرایه درک ایله بو ساعتیمده قارداش

ادامه در ادامه ی مطلب

جان کشتیسی غرق اولوب بلایه دریای مصیبتیمده قارداش

آخِر نفسیمدی گل هرایه درک ایله بو ساعتیمده قارداش

ایتمیشدیم ازلده عرصه نی تنگ شام اهلینه جنگ تن به تنده

روباه کیمی قاچاردی سرهنگ شمشیریمی برملا گورنده

قان توکماقا اولدولار هماهنگ شیراوغلونی سالدیلار کمنده

هم رای اولوب آلدیلار آرایه شدّتلی حماستیمده قارداش

ووردوقجا قلج صف لئامه باشلار طیران ایدوب هواده

یوز دوندروب اهل شام شامه سیندی قوشون آتلی هم پیاده

سعداوغلی گوروب پوزولدی لشکر سالدی شه لافتانی یاده

بیر ولوله دوشدی کربلایه چون شیر شجاعتیمده قارداش

هر تارک اهل کینه چالدیم شمشیریمی نعشی یرده قالدی

اسلامیده کفره لرزه سالدیم یردن گویه الحذر اوجالدی

صفلر داغیدوب فراتی آلدیم، ‌دشمن یوزی قورخودان سارالدی

قان چشمه سی آخدی نینوایه اسلامه حمایتیمده قارداش

ووردوم علمی فراته قارداش باش قوزادی بیرقیم سمایه

بیر سمت خیامه قوزادیم باش باخدیم سوسوز آل مصطفایه

رخساریمه گوزدن آخدی قانیاش گوردوم بالالار باخور لوایه

مخیمده آچوبلار ال دعایه آغلالّا بشارتیمده قارداش

سالدیم آتیمی لب فراته سیراب ایلدیم سوسوز عقابی

ویردوقجا او تازه جان حیاته یاد ایلدیم آل بوترابی

آهیم اودی دوشدی کائناته یاندوردی شراری نه قبابی

اگلشدی غبار غم سمایه هنگام رشادتیمده قارداش

سو مشکیمی ایتدیم آبیلن پر بندین ایلدیم چیگینده محکم

باخدیم سویا ایلدیم تفاخر غملی دلیم اولدی شاد و خرّم

دوشدوم یولا خیمه گاهه فاخر بیر الده قلج بیر الده پرچم

فخر ایلدی عرش کبریایه سو مشکی حراستیمده قارداش

بو سینمی ایلدیم نشانه میدان بلاده اهل جنگه

سو مشکیمی ایتدیلر بهانه شام اهلی ال آتدی تیر و سنگه

آنّیم هدف اولدی باتدی قانه اوچ شعبه لی قان توکن خدنگه

بیر مشکیدن اوتری مین بلایه دوشدوم بو حفاظتیمده قارداش

اوخ مشکیمه ایلدی اصابت مشکیم دیدی واردی اشکه رشکیم

مشک آغلادی مشکه باخدیم حسرت بیفاصله قانه دوندی اشکیم

یوز ویردی منه غم و مصیبت سو آخدی یره بوشالدی مشکیم

گیتدی هامی زحمتیم فنایه افسوس بو زحمتیمده قارداش

تیغیمدن ایدردی اهل کین باک ووردوقجا هواده برق شمشیر

قول دوشدی وجودیم اولدی صدچاک پیک اجلیمده اولدی تبشیر

بی پنجه گورنده شیری غمناک روباهلر اولدی خشمگین شیر

ال تاپدیلا پور لافتایه ظلم اهلی بو حالتیمده قارداش

دورمور یارالی باشیم بدنده غم کاسه سی غمله دولدی داشدی

هر اوخ منی قصد ایدوب گلنده پیکانه هدف یارالی باشدی

اوخ یاره لی جبهمه دگنده جنگ اهلینه جنگه جبهه آچدی

مهلک یارا ظلم اشقیایه شاهددی بو صورتیمده قارداش

قولّاریمی سالدی اهل کینه یوخدور الیم ال ویرم قاباقه

قانیم سو کیمی آخور زمینه جرات ویرور اهل اتّفاقه

امداده گل ای شه مدینه ظلمیله دوشوب آیون محاقه

سال لطفیله باشیم اوسته سایه بو آخِر ساعتیمده قارداش

مدّتدی صبا اولوبدی بیمار عشقیمده حق و حقیقت اوسته

هر لحظه فسرده، دیده خونبار دین اوسته ره شریعت اوسته

دنیانی سوینلر ایلور آزار دنیاده یالان ریاست اوسته

بیگانه اولوبدور آشنایه معناده حقیقتیمده قارداش

نوشته شده در تاریخ یکشنبه 15 شهریور 1394    | توسط: خادم حضرت علی اصغر (ع)    | طبقه بندی: احوالات حضرت ابوالفضل العبّاس (ع)،     |
نظرات()