زندان ستمی سالدی منی جاندان الهی

قورتار منِ مظلومی بو زنداندان الهی

ادامه در ادامه ی مطلب

زندان ستمی سالدی منی جاندان الهی

قورتار منِ مظلومی بو زنداندان الهی

هر قدری جفا ایلوری هارون منه دویمور

تندن ستم و ظلم و جفا رختینی سویمور

آسوده قالام گوشه ی زندانیده قویمور

ال چکموری بیداد فراواندان الهی

ایستردیم همیشه بیله بیر منزل خلوت

تا اینکه ایدم من سنه آسوده عبادت

آگاهسن ایلور منه هارون چوخ اذیّت

شرم ایتموری بو دیده سی گریاندان الهی

ساقِینیمی ازبسکه سیخوب حلقه ی زنجیر

یاره ایدوب ا...، آخوری قانی، چوخ اینجیر

هارونه دین یوخ ایدوب آیا بو نه تقصیر

چارم کسیلوبدور داخی هر یاندان الهی

اوز ظلمی منی سهلدی جاندان ایلیوب سیر

ایلوبدی زبس سند جفاسی دله تاثیر

ویردیم اودور علّت که مناجاتیمه تغییر

دویدوم داخی بو عالم امکاندان الهی

قان باغلیوب آخِر اورگیم کثرت غمدن

قدّیم بوکولوب اولدی کمان بار المدن

دویمور گینه هارون ستم پیشه ستمدن

رنج و محنیم دلده گیچوب ساندان الهی

دوتدوردی او گونکه وطنیمده منِ زاری

قویموب او قدر بیر گوروم اولادیمی باری

حسرت اودی اودلاردی همیشه بو فگاری

تا فرصت اله دوشدی بو زنداندان الهی

آخِر نفسیم اوّل آمالیمه یتدیم

بو محبسین آخِر نچه دم ترکینی ایتدیم

آغلار گوزیله گورماقا اولادیمی گیتدیم

تودیع قیلام عترت نالاندان الهی

جمعیّتیمون حالی منی ایتدی پریشان

گوردوم ایله جاندان آپاروب محنت هجران

بعضیسی قویوب غم دیزینه باش ایدر افغان

بعضی یورولوب ناله و افغاندان الهی

من قیمادیم ایلوم یاتان اطفالیمی بیدار

اُپدوم یوخودا یوزلرین ای خالق قهّار

گوزیاشلی، جگر داغلی، الیم قلبیده ناچار

آیریلدیم او بیر جمع پریشاندان الهی

یاد اولدی گینه دلده خدا سرور مظلوم

ایستردی وداع ایتسون حرم اهلین او مغموم

ایلردی ایله شور و نوا زینب و کلثوم

آلموشدولا طاقت شه دوراندان الهی

هر بیر آنانین خوردا بالاسی قوجاقیندا

بیر محنت عظمایه دوشنلر سیاقیندا

چکموشدوله صف سرور عالم قباقیندا

مبهوتیدی اول عالم هجراندان الهی

ایستردی حسین اهل حرم ترکینی ایتسون

گیتسون گیچوری فرصتی مقصودینه یتسون

شیرین دل اوشاقلار اونی قویمازدیلا گیتسون

چکمزدیلر ال اول شه خوباندان الهی

ناله اوجالانموشدی ایله آل عبادن

دولموشدی او صحرای غم انگیز نوادن

محصوره دوشن شه ستم اهل جفادن

حیرانیدی آخِر ایله بیر آندان الهی

بعضی بالا ایستردی که اُپسون دوداقیندان

چاتمازدی بویی، آخِر اُپردی ایاقیندان

آیریلمازیدی بعضی آتاسی قوجاقیندان

ایستردی سو بعضی او لب عطشاندان الهی

بیر سمت الی قوینوندا دوروب اصغر آناسی

بیر سمتیده لیلا دایانوب باشدا قراسی

بیر یاندا سکینه اوخوری حفظ دعاسی

تا بلکه سلامت گله میداندان الهی

بیر محشر کبرائیدی بیر شور قیامت

دگوشدی ایله بیر بیرینه آل رسالت

مشکل گله تقریره او هنگامه او ساعت

دوشموشدی حرملر هاموسی جاندان الهی

شوریله آلوب دور و برین عترت یاسین

دوتدی او شهین حال حیاتینده عزاسین

کیم اُلمه میش اولادی سالوب باشه قراسین

گلدی اورگیم درده بو عنواندان الهی

واردور یری آهیم اودی بو عالمی یاخسون

اشکیم کیمی خون جگریم عارضه آخسون

ای کاش گلوب فاطمه بیر اوغلونا باخسون

گورسون نجه آیریلدی او نسواندان الهی

توفیقیوی بیر لحظه خدا کسمه حسندن

عاصیدی خطاکاریدی شرمنده دی سندن

وردی بودی همواره که اغماض ایله مندن

عفو ایله گیلن ایتدیقوم عصیاندان الهی

من معترفم ایلدیقوم جرم و خطایه

سندن ولی واردور نظریم جود و عطایه

باش قوشما گیلن من کیمی بیر بی سر و پایه

قوما منی بو درگه احساندان الهی

نوشته شده در تاریخ پنجشنبه 24 اردیبهشت 1394    | توسط: خادم حضرت علی اصغر (ع)    | طبقه بندی: احوالات میلاد، مدح و شهادت حضرت موسی ابن جعفر امام کاظم (ع)،     |
نظرات()