مدّتدی یریم گوشه ی زنداندی الهی

بو یر منه بیر روضه ی رضواندی الهی

ادامه در ادامه ی مطلب

مدّتدی یریم گوشه ی زنداندی الهی

بو یر منه بیر روضه ی رضواندی الهی

بو محنت غربت، بو مصیبت، بو ملالم

بو کنده، بو زنجیر، بو محبس، بو عوالم

چوخ خوشدی منیم ای هامی احوالیمه عالم

ایتسم گِله اوز عشقیمه نقصاندور الهی

ویرمز بو بلالر منیم احوالیمه تغییر

معشوق بلاسی ایلمز عاشقی دلگیر

بیر طوق ارادتدی بو بوینومداکی زنجیر

هر حلقه سی بیر لعل بدخشاندور الهی

سندن اوزوم ایستردیم ایا قادر بیچون

بیر گوشه ی خلوت اولا بیر خاطر محزون

ایتدون من محزونی بو دلخواهیله ممنون

اوز ایستدیقوم یردی بو چوخداندور الهی

معشوقیله چوخ راز و نیاز ایتماقا عاشق

فارغ دلیله گوشه کناره اولی شایق

منده هامودان ایلموشم قطع علایق

بو مرحله عشق اهلینه آساندور الهی

دائم واریدیم وصلیوه محتاج وسیله

دونموشدی گوزوم یاشی همین فکریله سیله

مقصودیمی گتدی اله هارون اوز الیله

گور کوکب بختیم نجه رخشاندور الهی

ایمدی نه قدر واردی بو زندانیده فرصت

باش سجده ی طاعتده قویوب قیلّام عبادن

بو گوشیه سال بیر نظر لطف و عنایت

عبدون بولوسن طالب احساندور الهی

نه مایل اولاد و نه پابند عیالم

نه راغب جاهم و نه جویای جلالم

عمده نظریم سنده دی مشتاق وصالم

قلبیمده اولان بیر غم هجراندور الهی

چون رسمیدی محبوبی حبیبی ایده ارشاد

شکرانه سینه جان ویره اولماز اونا ایراد

وصلون ایلدی خاطر ناشادیمی چوخ شاد

قلبیم دیمورم لاله کیمی قاندور الهی

قانه بویانان جدّیم ایدر جلوه نظرده

قانیله دولان قلبیم علاوه گلی درده

جدّیم کیمی تسلیم ایدرم جان قوری یرده

بو مسئله چون رسم غریباندور الهی

هیچ کیمسه خدا اولمادی جدّیم کیمی مظلوم

باشدا یارا، دل زهرلی پیکانیله مسموم

جان ویردی جگر تشنه، اورک غصّه لی، مغموم

سو ویرمدیلر بولدوله عطشاندور الهی

دریا کیمی موج ایتدی فراتین سویی آخدی

یاندوردی عطش قلب شریفین اودی یاخدی

قانیله دولان گوزلری هردم سویا باخدی

گوزلر بو غمه ایمدیده گریاندور الهی

یارب به حق حجّت هفتم ایله بیر جود

الطاف کریمانه وه محتاجدی محمود

حضّاره شهابه اونا دنیاده کی مقصود

بیر کرب و بلا بیرده خراساندور الهی

نوشته شده در تاریخ پنجشنبه 24 اردیبهشت 1394    | توسط: خادم حضرت علی اصغر (ع)    | طبقه بندی: احوالات میلاد، مدح و شهادت حضرت موسی ابن جعفر امام کاظم (ع)،     |
نظرات()