یارب بولورم باشه یتیشوب باشیمده اولان تقدیر اُلورم

جان اوسته ولی چوخ اینجیدوری بوینومداکی بو زنجیر اُلورم

توپراقدا یوزوم، یولّاردا گوزوم، مسمومم اوزوم دلگیر اُلورم

ادامه در ادامه ی مطلب

یارب بولورم باشه یتیشوب باشیمده اولان تقدیر اُلورم

جان اوسته ولی چوخ اینجیدوری بوینومداکی بو زنجیر اُلورم

توپراقدا یوزوم، یولّاردا گوزوم، مسمومم اوزوم دلگیر اُلورم

آگاهم اوزوم اوّلده خدا من بیکسه نه فرمان یازیلوب

پیمان آلینوب امضا اولونوب تا قتلیمه بیر عنوان یازیلوب

بیر عمر منه بو غربت آرا زنجیر جفا زندان یازیلوب

تسلیم ایلیوب هر بیر ستمه اوّلده اولان تحریر اُلورم

ایستردیم اوزوم بیر مدّتیدی سندن بیله بیر خلوتگه راز

تا اولمیا بیر مشغول ایدنیم آسوده ایدم من راز و نیاز

جان اوسته دگول بیجا یره بو فریاد و فغان، بو سوز و گداز

آگهسن اوزون سِندین ستمی ایلوبدی منی دلگیر اُلورم

هر نوعی بلا یوز ویردی منه لا سویلمدیم وار منده رضا

دوزدوم او قدر بو حبسیده انجامه یتوب تا امر قضا

جانیم اریوب قدّیم بوکولوب، ازبسکه سیخوب بو تنگ فضا

یوخ باری ویرن هارونه خبر ویرسون یریمه تغییر اُلورم

معصومه هانی بو صون نفسیم قول بوینوما بیر شوریله سالا

گلسِیدی رضا گورسِیدیم اوزوم ممکندی گویول دردی آزالا

بو حسرتیله قویمازلا خدا بیر آن بو غریب آسوده قالا

قتلیمدن اوتور ایلولّه گینه هر آنیده مین تدبیر اُلورم

بیر سن بولوسن نه ظلمه دوزوب صبر ایلموشم بو جسریده من

وضعیّتیمی زندان دگیشوب تغییر ویروب اندوه و محن

ممکن دگی بو گر باخسا بیری تشخیص ویره زنداندا بدن

تشخیص ویرر بیر دست لباس یا اینکه قوری تصویر اُلورم

اولاد غمی هرچند منیم صبر دلیمی قلبیمدن آلوب

هجر آتشینه دلدن یانورام بیر عمریدی اود بو جانه سالوب

اوغلوم نیه بس گلمدی خدا حسرتله گوزوم یولّاردا قالوب

آخِر بولوری من جان به لبم ایلوبدی ندن تاخیر اُلورم

مظلوملرین ای مُنتقمی هارون منی چوخ مظلوم ایلیوب

ایل لردی منه زنجیر ووروب زندانه سالوب مغموم ایلیوب

آخِرده خدا رحم ایلمیوب جبریله منی مسموم ایلیوب

فوراً ایلیوب اکبادیمه بو زهرین اثری تاثیر اُلورم

عالِمسن اوزون یارب بولوسن بو زهریده وار نه قدری اثر

بو سهلیدی که اود دوتدی دلیم، یاندی اورگیم، دوغراندی جگر

گر باخسا بیری رنگ رخیمه مطلق گوره جاق واضحدی خبر

دل دوتموری من تا شرح ایلیوم حالیم ایدوری تقریر اُلورم

یاد اولدی گینه قلبیمده خدا میدان بلا شاهنشه دین

قان دجله سینه یخموشدی عدو یالقوز یارالی محزون و حزین

گل پیکرینه ووردوقجا یارا ایلردی خطاب ای لشکر کین

جان اوسته قویون آسوده قالوم وورمون بو قدر شمشیر اُلورم

انصاف ایلیون آز یاره وورون بسدور بو قدر پیکر یاراسی

من تشنه لبی جاندان آپاروب داش نیزه قلج خنجر یاراسی

کافیدی منه عبّاس اُلومی اصغر محنی اکبر یاراسی

ظاهرده قیروب بند دلیمی اوچ شعبه اولان بیر تیر اُلورم

آخدوقجا قانیم یره گوروسوز یرده توکولور یاحق یازیلور

عشقیمده گورور ثابت قدمم بو عشقه دیور صَدِّق یازیلور

تفصیل ویرور حق کلمه سینه حق لفظی یره مطلق یازیلور

تا واردی جهان حقّیّتیمی بو قان ایده جاق تفسیر اُلورم

عاصی بو شهین یازدون غمینی سوز دلیله آغلار گوزیله

واضحدی بو سوز، قویماز سنی شه حشره گله سن قاره یوزیله

همّت ایله سن اجرون آلاسان هر ایکّی جهان بیر بو سوزیله

یارب بولورم باشه یتیشوب باشیمده اولان تقدیر اُلورم

نوشته شده در تاریخ پنجشنبه 24 اردیبهشت 1394    | توسط: خادم حضرت علی اصغر (ع)    | طبقه بندی: احوالات میلاد، مدح و شهادت حضرت موسی ابن جعفر امام کاظم (ع)،     |
نظرات()