ظاهراً اولموش مکانیم گوشه ی زندان الهی

ایلیوب معناده عشقون روضه ی رضوان الهی

ادامه در ادامه ی مطلب

ظاهراً اولموش مکانیم گوشه ی زندان الهی

ایلیوب معناده عشقون روضه ی رضوان الهی

اینجیدر محبوسی دوزدور ظلمت زندان اولان یر

خاصّه دود آه، سوز سینه ی سوزان اولان یر

لیک اولار جنّتدن اعلی جلوه ی جانان اولان یر

جلوه گاه یاردور بو گوشه ی زندان الهی

گرچه بو زندان غمده بیر غریبم همدمیم یوخ

دردیمی اودلی اورکدن آلماقا بیر محرمیم یوخ

لیک مشغولم سنیله شادکامم هیچ غمیم یوخ

بیر منم بیر سن بو یرده ای حق منّان الهی

آتموشام گوزدن جهانی عشقیوین پابندیم من

دوتموشام یالقوز سنی بیر دلشکسته بندیم من

هر بلا گلسه یولوندا شاکرم خرسندیم من

صابرم هر ماجرایه جاندا تا وار جان الهی

حکم هارونیله گرچه تیره گوندور روزگاریم

لیک آرتار باشدا شوریم هردم آرتدوقجا فشاریم

ایتمرم هرگز گلایه ای گوزل پروردگاریم

اوزگه عالمدور بو عالم خالق سبحان الهی

وار یرون قلبیمده، سایر دلستانی نیلرم من

درد آلان سنسن، بیر آیری درد آلانی نیلرم من

مهربانیم سنسن، اوزگه مهربانی نیلرم من

مهربان سن، دلستان سن، ای سنه قربان الهی

عاشق جانباز جانان جانی نیلر، جان نه لازم

نائل وصل نگاره صحبت هجران نه لازم

دردمند درد عشقین دردینه درمان نه لازم

دردمند عشقیوم ای دردیمه درمان الهی

مدّت عمریمده یارب آختاروردوم بیله ساعت

یالقوز ایوده یاریمیله بیر قوریدیم بزم خلوت

یوخدی بیگانه یانیمدا منزلیمدور یاخشی خلوت

ایتماقا یاریله صحبت تاپموشام امکان الهی

بو منم بو خلوت ایو، بو اودلی دلده سوز و سازیم

بو قرانلوق ایوده روشن شمع آه جان گدازیم

بو سیزیلتیم بو نمازیم، بو منیم راز و نیازیم

چوخ سعادتدور ایدوبسن سن منه احسان الهی

قالموشام زندان غمده دلده اوزگه مطلبیم وار

بولسون اهل کلّ عالم نه شئون و منصبیم وار

باشدا ا... شوری، دلده ذکر یارب یاربیم وار

تا وارام دلدن بو ذکری سالمارام بیر آن الهی

گرچه اولموش بو رطوبی یر منه جای اقامت

اولمارام ناراحت اصلاً، منده یوخ روح شکایت

هیچ کیمه اولماز میسّر بیله بیر دارالعبادت

بو عبادتگه بو عبدون بو دل سوزان الهی

سسلرم دائم سنی من سوز و ساز اوستونده یارب

باشه ویرّم عمری عشق بی نیاز اوستونده یارب

خوش دوشر گر چخسا جانیم بو نماز اوستونده یارب

دم ویرن سن، جان آلان سن، جان سنه قربان الهی

عشق جانانیله باشدا شور عشقیم هردم آرتار

شوریم آرتدوقجا بو موج اشک چشمیم چوخ یم آرتار

شور گوزیاشیم آخاندا دمبدم روحیّم آرتار

قویمارام روحیّم اُلسون تا وارام تالان الهی

بیر مهم یتموش محاقیم، طالب دلسوزلاریم وار

ایمدی سرگشته وطنده آختاران اولدوزلاریم وار

بیر رضا آدلی جوانیم، نچّه آغلار قیزلاریم وار

گوزلری یولدا قالوبدور، اوزلری گریان الهی

بیر غریبم نه وطندن قاصدیم وار نه بریدیم

بیر گلن یوخ بیر گیدن یوخ، وار نه دید و بازدیدیم

ناامیدم هر طرفدن، باغلانوب راه امیدیم

بیر امیدیم وار سنه ای هادم حرمان الهی

حبسیده هارون جانی چوخ منی سالدی فشاره

تا آچام دل اعتذاره حق ویرم اهل نقاره

حق سوزوم اوسته دایاندیم، آچمادیم دل اعتذاره

نقشه ی هارونه ووردوم بیر خط بطلان الهی

من دیدیم یوخ جرم منده، جانی و قاتلدی هارون

عذر مجرمدن سزادور، مجرم کاملدی هارون

نیتمیشم عذر ایستیم من، حق منم باطلدی هارون

بو سوزیله حقّی قیلّام عالمه اعلان الهی

عاری یوخ زنجیر ظلمه باغلیم گر دستگیرم

بنده ی آزاد عشقم، قوم روباهه اسیرم

شیری زنجیره چکللر، من اوزوم شیر اوغلی شیرم

مسلمینه درس عبرت اولدی بو عنوان الهی

چوخ جنایتلر ویروب باش قوم بد بنیاد الیندن

دوشموشم دامه شکایت ایتمرم صیّاد الیندن

الامان ... امان بو سند شومین داد الیندن

روحیمی چوخ اینجیدور بو شوم بی ایمان الهی

یوسف صدّیقی آزاد ایلین حبس بلادن

وی ایدن اشجاری خارج قدرتیله تین و مادن

سن بو مظلومی خلاص ایت شرّ سند بی حیادن

رحم ایله بو دلفگاره راحم و رحمان الهی

تائبا قرآن یولوندا حاضر اول هر بیر بلایه

بیله که موسی ابن جعفر دوزدی هر بیر ابتلایه

هردم آرتدوقجا فشاری شکر ایدردی لایُرایه

تا دم آخِر دیردی جان سنه قربان الهی

نوشته شده در تاریخ پنجشنبه 24 اردیبهشت 1394    | توسط: خادم حضرت علی اصغر (ع)    | طبقه بندی: احوالات میلاد، مدح و شهادت حضرت موسی ابن جعفر امام کاظم (ع)،     |
نظرات()