تا قارداشینون آلدی سسین زینب مضطر

توکدی گوزینون یاشینی عرض ایتدی برادر

نازلی بالاوی ایستمه مندن آنام اوغلی

زینب اوزی شرمنده دی سندن آنام اوغلی

ادامه در ادامه ی مطلب

تا قارداشینون آلدی سسین زینب مضطر

توکدی گوزینون یاشینی عرض ایتدی برادر

نازلی بالاوی ایستمه مندن آنام اوغلی

زینب اوزی شرمنده دی سندن آنام اوغلی

بیز کوچ ایلین وقته سنون قتلگهوندن

آیریلمادی غم بلبلی پوزقون چمنوندن

زوریله ایردی اونی دشمن بدنوندن

آغلاردی اودور شامه گیدندن آنام اوغلی

هانسی گجه نی یاتدی دیدی وای یوخوسوندا

یعضی گجه لر چوخ دیوب ایوای یوخوسوندا

گوردوم که دیور اصغره لایلای یوخوسوندا

باندیم بو سوزی من ایشیدندن آنام اوغلی

گوردی سنیده بیر گجه رویاده برادر

هولیله آیلدی دیدی ای عمّه ی مضطر

گلمیشدی بابام، دور بابامی تاپ منه گوستر

ایستردی چخا روحی بدندن آنام اوغلی

هر قدر اوشاق ساکت ایدن دللریله من

ایستردیم اونی ساکت ایدم ایتمیه شیون

چکمزدی ال، ایستردی دوباره سنی مندن

رویاده گل وصلی درندن آنام اوغلی

کیم یاری قویار منزل بیگانه ده قارداش

گل صاحبی ساخلار گلی گلخانه ده قارداش

مدفون ایلدیم حیف اولا ویرانه ده قارداش

نورسته گلی من بو چمندن آنام اوغلی

سو ایچماق او مظلومیه تازه غم اولوردی

اصغر دیوب آغلاردی گوزی پرنم اولوردی

بلبل گوزینون یاشی گله شبنم اولوردی

گل سو یرینه قانین ایچندن آنام اوغلی

چوخ وقته گورردیم یولا حیران باخار آغلار

گیزلینجه دیردیم بالا دردون ایله اظهار

سویلردی گیده لّر هارا بو خوردا اوشاقلار

قالدیم متحیّر بو سخندن آنام اوغلی

دنیا بویی چخماز بالامین نسگلی یاددان

آیا نه روادور چخا شیرین دلی یاددان

چخسون نجه غم گلشنینون بلبلی یاددان

غربت چکن آواره وطندن آنام اوغلی

دوتدوم بالاما شامیده بیر شام غریبان

اولدی اوجادان آغلاماقا بیزلره عنوان

قبرین آلوب اطرافینی بیز جمع پریشان

قارداشی اُلن اوغلی اُلندن آنام اوغلی

گوزیاشلاری بنزردی آخان بارش ابره

زینب اوزی مبهوتیدی زینبده کی صبره

قویدی نجه قارداشی بالاسین عمّه سی قبره

صبر ایتدی وفا شمعی سونندن آنام اوغلی

دفن ایلموشم شامیده بیر قدرت پنهان

تا قصر یزیدی ایلیه خاکیله یکسان

حق کیمدی حقیقت ندی خلقه ایده اعلان

واردور بو اثر دفن ایلیندن آنام اوغلی

هر بنده که سوداگر بازار حق اولسا

چوخ سود آپارار هاردا خریدار حق اولسا

دنیاده ریاضیده طرفدار حق اولسا

عبرت گوتورر شامی گورندن آنام اوغلی

نوشته شده در تاریخ دوشنبه 31 فروردین 1394    | توسط: خادم حضرت علی اصغر (ع)    | طبقه بندی: احوالات اربعین حسینی،     |
نظرات()